VERSIÓN ORIXINAL. Unha exposición de Javier Olivares, en Pamplona
Do 5 de setembro ao 28 de outubro de 2025 nas Salas Nobres do Palacio do Condestable, con motivo do XVI SALÓN DO CÓMIC DE NAVARRA.
Desde Afundación e co Concello de Pamplona, presentamos en primicia en Pamplona a exposición “Versión Orixinal. de Javier Olivares”.
A mostra é unha oportunidade única para achegarse aos grandes personaxes da cultura popular a través da visión persoal de Javier Olivares, recoñecido ilustrador e historietista galardoado co Premio Nacional do Cómic. O seu estilo distintivo, que combina o cubismo sintético co expresionismo, ofrece unha interpretación fresca e orixinal de figuras emblemáticas do imaxinario cultural occidental.
A exposición reúne arredor de 150 pezas, moitas delas inéditas e presentadas por primeira vez ao público. Nela explórase tanto o traballo de Olivares como ilustrador —con obras para clásicos da literatura como Drácula, de Bram Stoker, ou Sherlock Holmes, de Sir Arthur Conan Doyle— como a súa faceta de historietista, destacando a adaptación ao cómic de O estraño caso do Dr. Jekyll e Mr. Hyde, realizada xunto a Santiago García.
Tamén están presentes personaxes icónicos do mundo da banda deseñada e da literatura gráfica, como Batman, Silver Surfer, Capitán América, Vampirella, Valentina, Mayor Fatal ou Hellboy, entre outros moitos. A mostra complétase con representacións de figuras do cinema clásico como King Kong ou A noiva de Frankenstein.
No apartado gráfico, a exposición ofrece unha gran diversidade técnica: obras enmarcadas en parede e expostas en vitrinas, bosquexos conceptuais, debuxos a lapis, traballos en tinta, acuarela, rotulador e gouache. Unha cita imprescindible para descubrir ou redescubrir o talento e a traxectoria dun dos grandes nomes do cómic contemporáneo.
AXENDA
Xoves 4 SET | 11.00 h | inauguración do Salón do Cómic e presentación de “VERSIÓN ORIXINAL. Unha exposición de Javier Olivares”. A continuación visita guiada á exposición.
Venres 5 SET | 16.00 a 19.00 h | J. Olivares estará na sala de exposicións para crear a súa obra ao vivo
19.00 h visita guiada á exposición por parte do comisario (Asier Mensuro) e o propio J. Olivares.
